Sciuldezza Bella
Antonello Rondi
Bella figliola ch'he 'ngannato a tante
Chi sa si 'e tradimente ll'he cuntate
Ma si t'affacce, 'e vvide a tuttuquante
Simmo 'a quarantaquatto 'nnammurate
'Ammore è doce e 'o spassatiempo è bello
Ll'arape 'sta fenesta o nun ll'arape?
Chist'è 'o mumento pe' chiammà ll'appello
Affàcciate nu poco e conta 'e ccape
Che finezza 'e cuncertino
Ma è n'orchestra o na fanfarra?
Peppe gratta 'o mandulino
Tòre pizzaca 'a chitarra
Giorgio sona 'a ciaramella
Papiluccio, 'o putipù
Picceré', sciuldezza bella
Sulo chesto saje fà tu
Bella figliola ch'he 'ngannato a tante
Tenive 'nfrisco tutte sti partite
Mo 'e vvide ca te sfilano pe' 'nnante
Ma 'o tiempo passa e tu nun te mmarite
Nun ce sta core ca nun he traduto
Nun ce sta vocca ca nun he vasato
Ma nun fa niente, va'. Chi ha avuto ha avuto
Tutto s'anconcia cu na serenata
Picceré', stu concertino
Porta overo 'e cape suone
Bebé canta a Vicenzino
Mette 'a terza da 'o puntone
Giorgio sona 'a ciaramella
Papiluccio, 'o putipù
Picceré', sciuldezza bella
Sulo chesto penze tu
Bella figliola ca staje 'nchiusa 'a dinto
Vulessemo sapé cu chi staje 'nchiusa
Fall'affaccià, ll'avimm' 'a fà cunvinto
Ca tu nu jiorne 'o 'nchiante cu na scusa
Tu si' na scellerata e 'o tradimento
Cresce cu 'e vase ca ve date o scuro
Dille ca se 'mparasse nu strumento
Ll'ha da sunà cu nuje ll'anno venturo
Picceré', pe' tutt' 'o vico
Vanno 'e nnote 'e 'sta canzone
Si vedisse 'on Federico
Ll'urganetto comm' 'o sona
Giorgio sona 'a ciaramella
Papiluccio, 'o putipù
Picceré', sciuldezza bella
Sulo chesto saje fà tu